ЙИЛҚИ
Tasnif: ’отлар подаси’. Барчин .. отасинимг тўқсон тўқай йилқисидан ўн отни сайлаб олди ("Алпомиш"). Бу от қадимги туркий тилдаги ’бир жойга тўпла-’ маъносини англатган йыл- феълидан -қы қўшимчаси билан ясалган (ЭСТЯ, IV, 282; ДС, 267); ўзбек тилида ы унлиларининг қаттиқлик белгиси йўқолган: йыл- + қы = йылқы > йилқи. Бу от асли ’кенг ўтлоқда эркин ҳаракатланиб юрувчи ҳайвонлар’ маъносини англатган; маънода торайиш воқе бўлиб, ’отлар подаси’ маъносини англата бошлаган.