
КЕЙИН
Tasnif: маълум вақт ўтгач, 'сўнг'. Ерга тушган чироқ бир-икки липиллади-ю, аввал кўк , кейин қизғиш аланга кўтарилди (Абдулла Қаҳҳор). Бу равиш қадимги туркий тилда ' охири, ' тугаш қисми' маъносини англатган кид отидан —(и)н қўшимчаси билан ясалган (ПДП, 394: кидин), кейинчалик и унлиси е унлисига (Девон, I, 230: кэдин); охири д ундоши й ундошига алмашган: кид + ин = кидин > кедин > кейин. Қадимги туркий тилдаёқ кид оти кед, кет тарзида ҳам ишлатилган (ДС, 292). Ўзбек тили шеваларидаги кетин равиши бу отнинг кет шаклидан ясалган, адабий тилда бу равиш бирин-кетин жуфт сўзи таркибида ишлатилади. Кейин равишидан кейин кўмакчиси ўсиб чиққан.