ҚАЙЧИ
Tasnif: икки тиғни ўртароқ еридан винт билан бирлаштириб тайёрланган кесиш асбоби'. Учта қ а й ч и д а н биттаси ҳам ишга ярамайди. Юзаки ёндашиб, бу сўзни -чы қўшимчаси билан ясалган дейиш мумкин, лекин бу қўшимча феълдан ясамайди: бу сўз таркибидаги қай— қисми асли қадимги туркий тилда 'ётиқ ҳолатда кес-' маъносини англатган қый- феълининг унлиси ўзгарган шаклига тенг [ДС, 406: қай- II см. қый-; 440: қый- 1. 'срезать, резать (наискось, косо)']. Эски ўзбек тилида қый- феълининг ана шу қай— шаклидан -(ы)ч қўшимчаси билан от ясалган ва унга кучайтириш, ' такрор' маъносини ифодаловчи — ы қўшимчаси қўшилган; кейинчалик иккинчи бўғиндаги тор унли талаффуз қилинмай қўйган, а унлиси ä унлисига алмашган, ы унлисининг қаттиқлик белгиси йўқолган: [(қый— > қай—) + ыч = қайич] + ы = қайычы > қайчы > қäйчи.